Назад

Палітыка

15

Правядзенне беларуска-грузінскага бізнес-форуму абмеркавалі ў Савеце Рэспублікі

04.09.2026 | 13:15

У Савеце Рэспублікі абмеркавалі падрыхтоўку і правядзенне беларуска-грузінскага бізнес-форуму, паведаміла БелТА.

У Савеце Рэспублікі прайшла сустрэча з Надзвычайным і Паўнамоцным Паслом Грузіі ў Беларусі Гіоргіем Саганелідзэ. Бакі абмеркавалі шляхі актывізацыі двухбаковага дыялогу і супрацоўніцтва ў розных сферах паміж дзвюма краінамі. «Мы надалі асаблівую ўвагу міжпарламенцкаму дыялогу. Апошнім часам кантакты па гэтай лініі актывізаваліся. Таксама мы спыніліся на эканамічным вымярэнні нашага супрацоўніцтва. У нас нядрэнная дынаміка ўзаемнага тавараабароту. За апошнія 4–5 гадоў нам удалося падвоіць аб’ёмы нашага экспарту ў Грузію. Таксама за першыя шэсць месяцаў гэтага года аб’ём нашага экспарту ў Грузію павялічыўся на 90%. Ёсць добрыя перспектывы выйсці на яшчэ вышэйшы ўзровень», — адзначыў старшыня Пастаяннай камісіі Савета Рэспублікі па міжнародных справах і нацыянальнай бяспецы Сяргей Алейнік.

У кантэксце абмеркавання перспектыў актывізацыі гандлёва-эканамічнага супрацоўніцтва бакі пагаварылі аб падрыхтоўцы і правядзенні беларуска-грузінскага бізнес-форуму. «Да яго мы будзем рыхтавацца сумесна па лініі ўрада і парламента. Мы таксама дамовіліся надаць асаблівую ўвагу жаночаму вымярэнню і плануем правесці асобную сустрэчу жанчын-прадпрымальнікаў на гэтым бізнес-форуме», — падкрэсліў старшыня Пастаяннай камісіі.

Таксама было разгледжана пытанне развіцця прамысловай кааперацыі. «У Грузіі ёсць сэрвісны цэнтр, які займаецца прасоўваннем і абслугоўваннем сельскагаспадарчай тэхнікі „Гомсельмаша“ і іншых нашых прадпрыемстваў. У васьмі гарадах Грузіі адкрыта каля 40 магазінаў з беларускай прадукцыяй, якую любяць нашы грузінскія сябры. На сустрэчы размова зайшла аб магчымасці стварэння больш буйнога гандлёвага дома не толькі з беларускімі прадуктамі харчавання, але і з таварамі прадпрыемстваў лёгкай прамысловасці, касметыкай, магчыма, нейкімі іншымі прадуктамі», — сказаў Сяргей Алейнік.

Не абмінулі бакі-ўдзельнікі сустрэчы і супрацоўніцтва ў сферы адукацыі, медыцыны і турызму. «Беларусь займае сёмае месца па колькасці турыстаў, якія наведваюць Грузію. Вядома, мы зацікаўленыя ў павелічэнні сустрэчнага турпатоку з Грузіі ў нашу краіну», — адзначыў парламентарый.

Гіоргі Саганелідзэ дадаў, што для ўмацавання дружбы паміж Беларуссю і Грузіяй ёсць вельмі моцная аснова. Народы дзвюх краін заўсёды сябравалі і працягваюць сябраваць. «Кіраўнікі нашых краін нацэлены гэтыя адносіны ўмацоўваць. Мы стараемся актывізаваць адносіны з беларускімі калегамі па розных напрамках», — падкрэсліў дыпламат.

Беларусь

| Грузія

| Савет Рэспублікі

| бізнес-форум