Эканамічны савет СНД зацвердзіў шэраг дакументаў, накіраваных на развіццё эканамічнага, транспартнага, інавацыйнага і гуманітарнага супрацоўніцтва дзяржаў Садружнасці. Рашэнні прыняты 11 верасня на 111-м пасяджэнні савета ў Ашхабадзе, паведамілі БелТА ў прэс-службе Выканаўчага камітэта СНД.

У прыватнасці, зацверджаны план мерапрыемстваў па рэалізацыі Стратэгіі забеспячэння транспартнай бяспекі на тэрыторыях дзяржаў — удзельніц СНД пры ажыццяўленні перавозак у міжнародных зносінах на 2026-2030 гады. Дакумент прадугледжвае комплекс мер па практычнай рэалізацыі ўзгодненых падыходаў да рэгулявання ў сферы транспартнай бяспекі. Эканамічны савет таксама адобрыў праект плана мерапрыемстваў па рэалізацыі Канцэпцыі гарманізацыі нацыянальных сістэм арганізацыі паветранага руху дзяржаў — удзельніц СНД. Чакаецца, што рэалізацыя дакумента дасць магчымасць павысіць бяспеку, рэгулярнасць і эканамічнасць палётаў грамадзянскай авіяцыі, а таксама якасць абслугоўвання паветранага руху.

Адным з рашэнняў пасяджэння стала прысваенне лічбавай платформе «Платформа развіцця бізнесу» статусу тэхналагічнай платформы ў рамках Міждзяржаўнай праграмы інавацыйнага супрацоўніцтва дзяржаў — удзельніц СНД да 2030 года па напрамку «Платформа развіцця інавацыйнага прадпрымальніцтва». Платформа прызначана развіваць доўгатэрміновае ўзаемадзеянне інстытутаў развіцця, тэхнапаркаў, ВНУ і органаў улады, забяспечваючы сувязь паміж навукай, адукацыяй і рэальным сектарам эканомікі.

Акрамя таго, Эканамічны савет СНД прысвоіў статус базавых арганізацый чатыром установам дзяржаў Садружнасці. У галіне трансфузіялогіі такой статус атрымаў Рэспубліканскі навукова-практычны цэнтр трансфузіялогіі і медыцынскіх біятэхналогій (Беларусь). У галіне бесперапыннай прафесійнай адукацыі спецыялістаў аховы здароўя базавай арганізацыяй вызначана Расійская медыцынская акадэмія бесперапыннай прафесійнай адукацыі Міністэрства аховы здароўя Расіі. Статус базавай арганізацыі ў галіне медыцынскай рэабілітацыі і санаторна-курортнага лячэння прысвоены Нацыянальнаму медыцынскаму даследчаму цэнтру рэабілітацыі і курорталогіі Міністэрства аховы здароўя Расіі. У сферы метадычнага і арганізацыйна-тэхнічного забеспячэння работ па лічбавым развіцці грамадства такой статус атрымаў узбекскі Цэнтр навукова-тэхнічных і маркетынгавых даследаванняў (UNICON.UZ).

На пасяджэнні таксама разгледжаны праекты Канцэпцыі развіцця супрацоўніцтва краін СНД у галіне вытворчасці перспектыўных матэрыялаў для высокатэхналагічных галін прамысловасці і плана яе рэалізацыі. Дакументы накіраваны на фарміраванне міждзяржаўнай навукова-тэхнічнай і вытворчай кааперацыі, трансфер тэхналогій і вынікаў даследаванняў у рэальны сектар эканомікі, развіццё нарматыўна-тэхнічнай базы і падрыхтоўку кадраў.

Члены Эканамічнага савета разгледзелі праекты Канцэпцыі лічбавай трансфармацыі галін лесапрамысловага комплексу СНД і адпаведнага плана мерапрыемстваў. Прадугледжваецца развіццё абмену вопытам па стварэнні інфармацыйнай інфраструктуры, а таксама лічбавых платформ у лясной прамысловасці.

Разгледжаны і праект комплекснага плана мерапрыемстваў на 2026-2030 гады па рэалізацыі Міждзяржаўнай праграмы інавацыйнага супрацоўніцтва дзяржаў — удзельніц СНД да 2030 года. Ён уключае канкрэтныя ініцыятывы і праекты з вызначэннем адказных выканаўцаў і тэрмінаў рэалізацыі і арыентаваны на развіццё чалавечага капіталу, павышэнне канкурэнтаздольнасці эканомік і збалансаванае прасторавае развіццё.

Сярод разгледжаных дакументаў — праект асноўных напрамкаў развіцця радыёнавігацыі дзяржаў — удзельніц СНД да 2030 года, які прадугледжвае ўдасканаленне радыёнавігацыйных паслуг на аснове сучасных тэхналогій і ўзгодненай тэхнічнай палітыкі. Удзельнікі пасяджэння таксама разгледзелі праект комплексу сумесных дзеянняў па прафілактыцы і барацьбе з бруцэлёзам да 2032 года. Яго рэалізацыя накіравана на прадухіленне заносу і распаўсюджвання захворвання і мінімізацыю звязанага з ім эканамічнага ўрону.

Асобная ўвага ўдзелена пытанням узаемнага гандлю. Членам савета прадстаўлена інфармацыя аб існуючых перашкодах ва ўзаемным гандлі дзяржаў — удзельніц СНД і рэкамендацыях па іх устараненні. Матэрыялы падрыхтаваны з улікам інфармацыі краін аб прымяняемых ахоўных, антыдэмпінгавых і кампенсацыйных мерах, абмежаваннях, забаронах, ліцэнзаванні і кватаванні тавараў, а таксама вынікаў работы профільнай рабочай групы.

На пасяджэнні разгледжаны справаздачы аб дзейнасці Міждзяржаўнага савета па стандартызації, метралогіі і сертыфікацыі за 2023-2026 гады і Міжурадавага савета па пытаннях аграпрамысловага комплексу СНД за 2023-2025 гады. Адзначана, што профільныя органы выконваюць пастаўленыя задачы, у тым ліку па развіцці супрацоўніцтва ў сферы тэхнічнага рэгулявання, стандартызації, метралогіі, АПК і забеспячэння харчовай бяспекі.

З разгледжаных на 111-м пасяджэнні Эканамічнага савета СНД дакументаў 12 у далейшым будуць прадстаўлены Савету кіраўнікоў урадаў Садружнасці. Наступнае пасяджэнне Эканамічнага савета СНД запланавана на 27 лістапада 2026 года ў Маскве.